Progress Foundation — Dibra Tourism Academy — DTA (Akademia Turistike Dibër)

Fondacioni Progress, që prej vitit 2014, i është përkushtuar misionit për të ndërtuar një të ardhme më të mire për shoqërinë shqiptare nëpërmjet programeve të shkëmbimit kulturor dhe edukativ. Bashkëpunimi i vazhdueshëm i anëtarëve, ndarja e ideve, vlerave dhe përvojave synon të japë një kontribut domethënës në progresin e vendit. Një rëndësi mjaft e lartë i është kushtuar përmirësimit të cilësisë së arsimit dhe formimit të të rinjve duke mundësuar bursa studimi, programe trajnuese, konferenca kombëtare e ndërkombëtare apo bashkëpunime me organizata të ndryshme.

Me këtë fokus në mendje, Fondacioni Progress ka zhvilluar dhe organizuar projektin DTA, Dibra Tourism Academy (Akademia e Turizmit Dibër) në kuadër të programit të Zhvillimit të Qëndrueshëm Rural (SRD), i implementuar nga Giz Albania.

SRD ka mbështetur dhe promovuar Dibrën si një zonë me një potencial të lartë në turizmin e Shqipërisë, e cila ofron një varietet atraksionesh dhe aktivitetesh që mund të përmbushë shijet e çdo pushuesi vendas apo të huaj. Një hallkë mjaft e rëndësishme e zhvillimit të turizmit është pa diskutim punësimi në këtë sektor i punonjësve të përgatitur, vizionarë, të përkushtuar dhe pasionantë dhe kush mund ta bëjë këtë punë me aq pasion sa rinia vendase?

Akademia e Turizmit Dibër u themelua dhe krijua enkas për të përfshirë të rinjtë dibranë në një program trajnimi të mirëfilltë e të mirëmenduar për formimin dhe zhvillimin e disa aftësive që do t’u hapin këtyre të rinjve mjaft dyer në tregun e punës.

50 të përzgjedhurit që përfituan nga ky projekt i përkasin grupmoshës 18–40 vjeç, të papunësuar dhe janë nga zona rurale të Dibrës, Peshkopia, Maqellara, Melani apo Tomini. Trajnimi përfshiu ndërtimin e aftësive të përgjithshme dhe kapacitetin për të menduar në mënyrë inovatore dhe kreative për ide të reja biznesesh lokale që do të sjellin rezultate pozitive në zhvillimin e hapësirave rurale të Dibrës.

Pjesëmarrësit ishin mjaft të përkushtuar dhe e vlerësuan këtë trajnim si një mundësi mjaft të mirë për të përfituar njohuri, për të qenë më të kualifikuar dhe për të ndërtuar profilin e tyre profesional. Ata mësuan rreth planifikimit dhe strategjisë së marketingut, rreth komunikimit, punës në grup si edhe çelësat e suksesit. Shumë prej të rinjve kishin interes të lartë të punonin si guida turistike dhe falë trajnimeve mësuan shumë për mikpritjen, organizimin e guidave, itinerareve dhe destinacioneve më interesante. Një tjetër pikë mjaft e rëndësishme ku u përqëndrua ky program ishte përmirësimi i aftësive komunikuese në gjuhën angleze, tashmë një domosdoshmëri për këdo që interesohet të punojë në turizëm.

Në përfundim të projektit, të rinjtë u pajisën me certifikata përkatëse si edhe me një sërë aftësish që do t’u sigurojë punësim të mundshëm në bizneset lokale, organizatat apo insitucionet që lidhen me turizmin në rrethin e tyre. Projekte të tilla u mësojnë të rinjve, mbi të gjitha, se në vendin e tyre ka ende alternativa të cilat premtojnë të shtohen edhe më tej në të ardhmen.

Falenderojmë Fondacionin Progress për punën në këtë projekt si edhe trajnerët profesionistë e të palodhur të certifikuar nga Giz-Proseed. Po ashtu falenderojmë edhe pjesëmarrësit për angazhimin dhe urojmë të dëgjojmë sa më shpejt që puna e tyre ka dhënë frutet e shumëpritura.

Albumi përmban foto të zbatimit 1 vjecar të projektit korrik 2019 — qershor 2020, përjashtuar periudhën mars — maj 2020 kur aktivitetet janë pezulluar. Aktiviteti i certifikimit në qershor 2020 është zhvilluar jashtë, duke ruajtur distancën dhe me maska.